Friday 28 January 2011

But

Mesti urang nyebut, "ka mantai ke but diri pia". Enda alah dipelalai ke nama utai disebut "but" enda pia. Nya meh dalam dunya tu cukup maioh curak pendiau, perangai sereta pengidup mensia.

Setegal siku dua ari diri sekaban, tauka diri sebilek tauka diri menyadi@petungal alu kena rampit meh urang bukai. Nya meh sempama munyi ko laut " kerana nila setitik, rosak susu sebelanga". Nemu meh kitai mensia tu tusah ka diadu ke, tang pelaba aku ti untak diguna engau manah, pemerinsa tauka pemedis ke udah nyadi digaga nyadi ke teladan jena dia ka ngenyaie kediri agi ulih runding sereta dirunding memanah ngambi enda ngenyadinya tau ka nyau majak jai.

Pelaba aku nadai apai indai ngajar ngasuh kitai nyadi mensia ke enda beguna tauka munyi ke jaku urang maia ari tu "sampah masyarakat" Taja pan bisi kitai ninga macam-macam cerita pasal apai indai ke ngajar anak ngereja pengawa ke jai, tang meh pelaba aku jarang utai tu nyadi.

Enda ngawa pendiau enda kaya raja tang meh anang penyaie nyu enda alah ibun sereta alu enda nemu nyesal ke pengawa ke udah dikereja nadai mulai ke penguntung. Udahnya enda badu-badu ngenusah ke apai indai. Ti kena tinggang penusah baka tu bula ngambi diri enda begedi ati meda pendiau kaban belayan ke bansa tu.

Udahnya legi tudah apai indai, kaban madi sereta kaban belayan dikumbai jai magang ketegal but siku mensia. Udahnya ia ke mai butnya tadi alu madah apai indai, kaban madi sereta kaban belayan enda nemu nulong meri duit meri ringgit sereta engau maioh macam pemeri ngambi sida ulih idup senang. Indah sida tukay nemu bangkrap ti bisi ngempu kaban belayan bakanya anang agi apai indai ke bumai tauka kaban madi/belayan ka sama idup cukup makai tauka kaban ke idup mimit setegal entua tauka laki tauka bini bisi kereja menyana tang meh sida ia bisi pengidup diri empu.

Sekali dua ulih meh urang nulung. Tang enti dalam setaun nyu ka 6-7 kali minta jali tauka minta tulong, nadai pan urang tan. Ia ke empu but nya tadi nyu munyi ko jaku laut " bepeluk tubuh" engau "berlagak" enda abis-abis. Legi urang ngajar engai ga ninga. Bahhhhh kati ko deh????? nadai urang ka nulong kitai belama.

Nya meh sempama jaku urang tuai, ba setangkai padi nadai nya berisi magang, maioh meh ke nyadi ampa. Sigi enda bula tang bak sekeda apai indai ke nadai nasit sereta balat diberi penguji ari Tuhan enda eran ti setangkal padinya nyadi ampa magang. Nya meh penguji cukup besai ba kitai ka apai indai, penguji ba ngidup sereta ngemesai ke bala anak ngambi nyadi mensia ke menyana.

Ehhhhhhhhh aku sebana nunda Carol ka???? semina ngenang aja kena ngerajin kediri ngupdate beluk keno.

No comments: